طريقة سهله للبيتزا

المقادير:

2 كوب دقيق ابيض
1/2 كوب دقيق سميد
1/4 كوب زيت زيتون
2 معلقه صغيرة خميرة فورية
رشة ملح
معلقه صغيرة بودرة الثوم
3معلقة كبيرة لبن بودرة
1بيضة
1 كوب زبادى
اضافة ماء دافئ على حسب الحاجه لغاية ما تتلف معاكى العجينه

لحشوة البيتزا : صوص طماطم ، زيتون أسود ، بسطرمة ، مشروم ، فلفل رومى مكعبات ، بصل مقطع مكعبات ،
، جبنة موتزاريلا ، أو على حسب الرغبة

الطريقة:


1- نضع الدقيق الأبيض على الدقيق السميد مع رشة الملح مع الثوم البودره واللبن البودره ونخلطهم مع بعض
2- نضع زيت الزيتون ونخلط الكل مع بعض حتى يندمجوا مع بعض
3- نضيف الماء الدافئ شويه شويه وكمان البيضه ونعجنهم جميعا لمدة عشر دقائق وكلما زادت مدة العجن اصبحت العجينه هشه وطريه ونتركها ترتاح حوالى ساعة
وبعدين نفردها فى صينية مدهونة بالزيت وبعدين نخرمها بالشوكة علشان تتشرب من صوص الطماطم وعند التسوية لاترتفع من الوسط وبالنسبة للحشوة على حسب الرغبة وانا حطيت بسطرمة ومشروم وزيتون اسود وبصل مقطع صغير وفلفل رومى مكعبات وعلى الوجه جبنة موتزاريلا وحشيت الأطراف هوت دوج ونضعها بالفرن من سبعة لعشرة دقائق والفرن من فوق ومن تحت شغال على درجة 180 وطبعا فرنى كهرباء
ملحوظه : الجبنة نضعها اخر 3 دقائق من السواء علشان لا تنشف

ولسة هجبلكو طرق تانية كتير

بيزا تانية


المقادير


نذوب باكو خميره فوريه جافه او معلقه واحده خميره بيره في ربع كوباية ميه دافيه (لا هي سخنه تموت الخميره ولا هي بارده توقف عملها لما تحطي فيها صبعك تكون دافيه وفي نفس الوقت تتحملي حرارتها)
ونضيف لها معلقة سكر ونتركهم في مكان دافي لحد لما ترتفع وتعمل رغاوي وده دليل ان الخميره فعاله


4 كوب دقيق - معلقه كبيره بكنج بودر - معلقه صغيره ملح ... يتخلطوا مع بعض في طبق كبير
نعمل حفره في نص الدقيق ونضيف الخميره المذابه ومعلقتين كبار زيت زيتون (ربع كوبايه)
ونبدأ نعجن العجينه باضافة كوباية ل كوباية ونصف حليب دافي حسب نوع الدقيق اوخليط من الحليب والماء


ننقل العجينه على الترابيزه ونعجنها كويس بالضغط عليها وتجميعها مره تانيه وهكذا وهي بتبقى بتلزق في الايد في الاول بس مع استمرار العجن هتبدأ تلم
وممكن ترشي رشات خفيفه دقيق اثناء العجن لحد لما تحصلي على عجينه مطاطيه ممكن فردها
نحطها في طبق كبير ونرشها بالدقيق من فوق وتحت او ندهنها زيت وتتغطى بفوطه نظيفه


نتركها ساعه تتخمر في مكان دافي لحد لما ترتفع

اثناء التخمير نبدأ نجهز التوبينج ...


الصلصه


معلقة صغيره ثوم مفروم تتحمر مع معلقتين زيت زيتون بدون ما يتحرق الثوم ولا يتغير لونه ونضيف عليها 3 طماطم مقشرين ومفرومين ناعم ومعلقتين صلصه ونتركها على نار هاديه لحد لما الميه تنشف
في الاخر نضيف ملح ونقطتين خل ورشة سكر ورشة زعتر او ريحان او نعناع .... ساعات باضيف شبت او بقدونس خاصة لو بيتزا الجمبري او فواكه البحر


تقطيع الحشو


تقطعي فلفل شرايح كتييير و زيتون ثلاثه او اربعه وبسطرمه او سوسيس و نبشر الجبنه الرومي معلقتين وفصين ثوم نفرمهم ونحضر الجبنه الموتزاريلا


لو هاعملها بفواكه البحر باشوح الجمبري والسبيط في شوية ثوم وعصير ليمون او رشة سماق وملح واسيبهم على النار العاليه 5 دقايق لحد لما ميتهم تنشف


لو بالتونه بتصفيها من الميه او الزيت كويس قبل ما تستخدميها


نفرد العجينه بالنشابه .. المقدار ده بيعمل واحده كبيره تكفي الاسره كلها . نفردها بسمك متوسط لا هي رفيعه ولا تخينه


وننقلها على الصينيه تكون مدهونه زيت ونبدأ نفرد في الاول الصلصه
ثم رشة جبنه موتزاريلا علشان تمسك الحشو
ثم نرص البسطرمه والسوسيس او الجمبري او التونه والزيتون الثوم المفروم وعلى الوجه الفلفل الاخضر
وفي الاخر باقي الجبنه (باستخدم الكيس كله) ورشة خفيفه جبنه رومي


نتركها تخمر مره تانيه في مكان دافي لمدة نص ساعه او ساعه ... او في الثلاجه لتاني يوم


نسخن الفرن قبل ما نحط البيتزا على حراره عاليه 200 درجه
هي بتاخد عشر دقايق ربع ساعه بالكتير وقبل ما نخرجها نرش عليها زيت زيتون


نخرجها مباشرة من الفرن اول ما تتحمر ... وتكه صغيره بلاش تحمري الجبنه قوي .. مجرد ما تسيح وتاخد لون خفيف خرجيها
وغطيها بصينيه او غطا بنفس الحجم علشان تطرى من البخار الناتج منها
وعشان نتجنب مشاكل البيتزا

1- البيتزا بتطلع معجنه بالرغم من ان الخميره والمقادير مظبوطه
الموضوع ده بيحصل لما بتتخمر فتره زياده عن الساعه ولو حصل اي ظرف خلاكي تأخري استخدام العجينه دخليها الفريزر علشان توقفي عمل الخميره ولما تحبي تعمليها خرجيها تفك في مكان دافي واستخدميها عادي
او ممكن تكون بسبب ان السايل في العجينه كتير عن الدقيق (العجينه سايبه)
او ان الخميره مش شغاله وماخمرتش كويس


2- البيتزا بتتحرق من تحت ومقرمشه من تحت فقط .. اما نوع الصينيه بيحرق الاكل او انك بتدهني زيت كتيييير قوي او ان فرنك عالي بزياده وفي الحاله دي ارفعي الصينيه على اعلى رف في الفرن


3- البيتزا ناشفه ... لو عجنتيها بميه فقط وفردتيها رفيع هتطلع كريسبي وناشفه فالحل انك تدخلي فيها حليب وتفرديها مش رفيع قوي
او ان الفرن هادي او حطيتي البيتزا قبل ما تشغلي الفرن وتسخنيه والحل انك تسخني الفرن قبلها على حراره عاليه


4- العجينه مش بترتفع .. مااختبرتيش الخميره الاول لان الخميره ممكن تكون بايظه او نوعها مش كويس
وافضل نوع الخميره البيره من عند المخابز او اكياس رحاب(مكتوب عليها خميره جافه نشطه)


وممكن لو الخميره اختبرتيها الاول ومتأكده منها تكون بسبب انك عجنتيها بميه بارده مش دافيه او ان الجو ساقع .. وفي الحاله دي ... تسخني الفرن لحد لما يبقى دافي وبعدين تطفيه وتدخلي فيه العجينه متغطيه بفوطه لحد لما ترتفع مره تانيه


5- التوبينج بينزل ميه على العجينه ويسبب انها تتعجبن ... اللي بيعمل ده استخدام الطماطم او اي خضار بينزل ميه .. الطماطم قبل ما تستخدميها شيلي البذور وحطيها في مصفاه بعد ما تقطعيها علشان تتخلصي من الميه عن نفسي مش باستخدم طماطم وباكتفي بالصلصه
والافضل لو هتستخدمي خضار زي السبانخ او الكوسه تشوحيه قبلها لحد لما ميته تنشف

الله عليكى يامى بجد الموضوع رائع تسلمى يارب وبجد انا جعت اقولك انا هقوم اعمل بيتزا بنفس الطريقة دى

ابقى سبيلى حته

يا ولاد اللذينه دى اكيد طعمها جامد
انا عايز حته بقى

لا ياعم انا اللى قولت الاول ما انا عارفة منى هتطنشنى وهتديك انت